Caminha2000

GUARTE, DESFILE DO TRAXE GALEGO e II RUTA DO PINCHO actividades para éste fín de semana na Guarda

Co nome de “Guarte”, dará comezo o vindeiro Domingo día 10 de Maio a Iª Mostra de Artesanía organizada pola Asociación ‘ábaco’ Cultural e Turística do Baixo Miño no Porto de A Guarda, coincidindo co “Desfile do Traxe Rexional”, organizado pola Asociación para a Recuperación do Traxe Galego de A Guarda e a “II Ruta do Pincho”, organizada pola Asociación do Baixo Miño de Comerciantes e Empresarios ‘ábaco’.

Este Domingo a Guarda terá unha ampla oferta para todos os visitantes, por unha banda ás 12:00horas do mediodía inauguraráse “Guarte”, unha mostra de artesanía que estará localizada no paseo peoníl do Porto de A Guarda e na que máis de 14 artesáns vencellados á xoiería, coiro, prata, orfebrería e reciclaxe exporán os seus productos nos diferentes stands que se colocarán para esta ocasión.

Por outra banda ás 18:00horas terá comezo o “Desfile do Traxe Galego” que sairá dende o Transversal Troncoso (Alameda de A Guarda) e fará un percorrido polas rúas principais e finalizará no Porto de A Guarda.

Do mesmo xeito e en horario de 11:00horas a 13:30horas e de 19:00horas a 22:00horas poderánse degustar os sabrosos pinchos que ofertan gratuítamente, xunto con unha consumición, os establecementos asociados á ‘ábaco’ que participan na segunda edición da “II Ruta do Pincho” dende o 8 de Mayo e ata o 7 de Xuño.

Nestas actividades organizan, a Asociación para a Recuperación do Trexe Rexional de A Guarda, a Asociación Cultural e Turística do Baixo Miño ‘ábaco’ e a Asociación do Baixo Miño de Comerciantes e Empresarios ‘ábaco’ e á súa vez colaboran, o Concello de A Guarda, a Deputación de Pontevedra, a Consellería Cultura e Turismo, a Dirección Xeral de Turismo da Consellería de Innovación e Industria, o Foro Galego do Comercio, Caixanova, Hostal Bruselas e Cervexa Amstel.

"ábaco"

O BNG presenta unha moción en defensa da lingua galega

"Dende o BNG faise un chamamento a toda a cidadanía para que apoie e asista á manifestación do 17 de maio en defensa da lingua galega en Santiago de Compostela"
O portavoz municipal do BNG, Xan Lois Lomba, presentou no rexistro do concello unha moción en defensa da Lingua Galega para ser debatida no próximo pleno ordinario de maio.
Para o BNG resulta evidente que o proceso de normalización de usos do galego foi lento e, até hoxe, insuficiente para garantir o dereito a vivir na nosa lingua.
Asistimos nos últimos tempos a unha situación esperpéntica, por canto existen sectores -políticos e mediáticos- que pretenden trasladar á opinión pública a idea de que o idioma castelán corre perigo en Galiza por mor da suposta discriminación a que se ven sometidas as persoas que falan nesta lingua.
Un contundente informe do Consello de Europa elaborado a finais do pasado ano, advertía que no noso País non se están a dar garantías para o uso normal do galego en sectores tan importantes como a educación, a xustiza, os servizos públicos ou os medios de comunicación; incumpríndose de feito os tratados internacionais sobre dereitos lingüísticos. Na mesma liña, un recente informe da Real Academia Galega sinala que en doce anos reduciuse á metade a cantidade de persoas que falan habitualmente en galego.
Para o BNG resulta preocupante as declaracións de persoas con cargos de alta responsabilidade no novo Goberno Galego que supoñen un ataque contra do galego e mesmo poden supoñer un perigo de confrontación e de fractura social; á marxe de ir contra de acordos unánimes do Parlamento Galego, nomeadamente contra o recollido no artigo 5 do Estatuto de Autonomía, que sinala o galego como lingua propia de Galiza e a obriga dos poderes públicos de potenciala nos diferentes ámbitos de uso.
A formación nacionalista solicita un posicionamento claro e contundente a prol do galego na liña dos acordos adoptados no Parlamento Galego, apoiar o 'Manifesto pola convivencia lingüística e a igualdade de dereitos para o galego'.
Dende o BNG faise un chamamento a toda a cidadanía para que apoie e asista á manifestación que se vai celebrar o próximo domingo 17 de maio en Santiago de Compostela, coincidindo co Día das Letras Galegas, en Defensa do Idioma Galego.
BNG