O próximo día 8 acenderase o alumeado de Nadal en Tui O próximo mércores, 8 de decembro, terá lugar o acendido da iluminación de Nadal nas principais rúas de Tui. O alumeado continua a política municipal de fomento da eficiencia enerxética, e ao igual que nos últimos anos, emprega lámpadas de tecnoloxía led, co que se produce un importe aforro enerxético con respecto ás lámpadas tradicionais. O obxectivo desta iluminación é embelecer a cidade co gallo das festas de Nadal, pero cun criterio de responsabilidade económica e medioambiental, baixo un criterio de maior eficiencia enerxética e menor contaminación lumínica. O alumeado permanecerá acendido dende o 8 de decembro ata o 6 de xaneiro en horario de seis da tarde a dúas da madrugada. Comprenderá a iluminación con microbombillas e fio luminoso de led en máis de 130 arcos, a iluminación das arbores do Paseo da Corredoira con lámpadas, pebeteiros de led e led ball en cor branca, e a iluminación das prazas con motivos en 3D. Tamén se contempla a sonorización do Paseo da Corredoira e das dúas Augusto González Besada, Casal Aboy, Compostela, Martínez Padín, Lugo, Ourense, Mondoñedo, Betanzos e comezo da Avenida da Concordia. Tamén se colocará un belén iluminado na Praza da Inmaculada. O investimento total da colocación deste alumeado de Nadal e a sonorización das rúas ascende a 49.383 euros. O Concelleiro de Cultura, Moisés Rodríguez, salienta a aposta que un ano máis dende o Concello se realiza polo alumeado de Nadal. Nesta ocasión e pese a crise explica que se mantén o investimento tendo en conta as boas repercusións que o alumeado ten para o comercio local tal e coma apuntan algúns estudo que falan dun incremento das vendas nun 20% nas zonas ben iluminadas. A iluminación dota á cidade dun atractivo especial e son centos as persoas que cada ano se achegan ata Tui para admirar estes motivos navideños, o que ten tamén a súa positiva repercusión no comercio e na hostalería locais.

OITO DIRECTORES DE DOCUMENTAIS DE TODO O MUNDO VIAXAN A TUI PARA FINALIZAR AS SÚAS PELÍCULAS Oito cineastas procedentes doutros tantos países foron seleccionados para participar no novo taller de creación cinematográfica que o Festival Internacional de Documentais, Play-Doc inicia o próximo 6 de decembro. Docs in progress é unha iniciativa coa que o festival galego pretende apoiar a novos realizadores de documentais de todo o mundo. Este taller levarase a cabo do 6 ao 19 de decembro e durante estas dúas semanas os participantes terán a oportunidade de finalizar as súas películas documentais que xa foron rodadas e actualmente atópanse en fase de montaxe. O taller estará dirixido por Marta Andreu, produtora e coordinadora do Master en documental de creación da Universidade Pompeu Fabra de Barcelona, e ademais contará coa visita de recoñecidos profesionais internacionais vinculados á produción e exhibición documental, que achegarán as súas visións e asesoramento sobre o estado de cada unha das películas en curso. Yrsa Roca de Islandia, Mariana Viñoles de Uruguai, Alejandra Grinschpun e Fernando Boto de Arxentina, Thais Taverna de Brasil, Nina Bendzko de Alemaña e Víctor Hugo Seoane e Pela del Álamo de Galicia, son os realizadores seleccionados para participar nesta actividade. Cada proxecto recibirá unha bolsa de axuda de 1.000€ e durante o desenvolvemento deste novedoso taller os participantes convivirán na casa rural O Remesal de Tui. Ante a necesidade de xerar espazos de creación alternativos aos mecanismos de produción habitual Play-Doc, a través desta iniciativa, dá un paso máis no seu apoio aos novos talentos audiovisuais. O taller Docs in Progress conta co apoio do Instituto de Cinematografía e das Artes Audiovisuais (ICAA), do Concello de Tui así como doutras institucións. Play-Doc