Concello de A Guarda

O Castelo de Santa Cruz da Guarda será o escenario para a realización de "Ioga de Verán", un encontro de ioga ao aire libre para todos os públicos que se vai desenvolver o domingo 26 de xullo ás 10:30h.

Cada participante deberá traer unha esteira ou toalla, un cinto ou un foulard.

Esta actividade é totalmente de balde, pero é preciso unha inscrición previa no seguinte formulario: https://docs.google.com/forms/d/e/1FAIpQLScFkPjZ8qL95m9G3VNl1g9Zw4JyKBsqgWTPZCaTeIB5Rw0AKQ/viewform?vc=0&c=0&w=1

Os interesados en participar poden ampliar información no Departamento de Deportes do Concello da Guarda chamando ao 690928751 ou contactando en deportes@aguarda.es

Concello de A Guarda

O Concello da Guarda, a través da Concellería de Deportes que dirixe Montserrat Magallanes, quere facer un recoñecemento público ao Clube de Xadréz Albatros por ter acadado un importante logro deportivo como é o ter logrado o ascenso á Primeira división autonómica.

O Xadrez Albatros ten a súa orixe hai case vinte e cinco anos nunha cafetería que lle deu nome, nun autobús que lle deu forma e dunhas persoas inquietas por este deporte. A cafetería é o Albatros, o autobús e o que sae tódolos días da Guarda cara Citroën e os xogadores, uns amigos entorno un café.

Posteriormente, estes veciños da vila decidiron formar un club de xadrez. Tiñan ideas, tiñan desexos, pero o que máis lles sobraba era ilusión e ter a sorte de aparecer un xogador que emigrou dende Rusia ata Galicia por motivos laborais. Iso foi o espoldrarao definitivo ó proxecto. Dita persoa aportou uns coñecementos que descoñecían os seus fundadores. Coñecementos que hoxe quedarían obsoletos e de nivel incipiente, pero deu certa credibilidade a idea e permitiu o desenvolvemento do proxecto coa aprobación duns estatutos, creación dunha xunta directiva e a incorporación e alta nos organismos competentes. Acababa de nacer a Asociación Cultural e Deportiva Albatros de mans do seu presidente Vladimir Stoujinski (ano 1995).

No ano 2000 créase a Escola de Xadrez Albatros, despois de varios intentos previos que non acadaron continuidade no tempo. Comeza o ensino do xadrez a partir dun pequeno grupo de rapaces onde se promove o aprendizaxe do xogo e a participación en Torneos infantís. Torneos que foron o embrión de todo o que hoxe acontece. Constituísen uns equipos federados que participarán na Liga de Clubs Galegos na Terceira División Rexional, e Cuarta División. Tamén debemos subliñar que a Escola de Xadrez Albatros tivo a súa evolución; Novos profesores aportaron estudos e estratexias na concepción de aperturas e unha mellora substancial neste deporte.

Hoxe, estes "nenos" teñen preto de vinte e cinco anos, xogaban en segunda división que tras tocar cos dedos varias veces esa categoría terminaban fracasando na derradeira xornada, agora con certa "facilidade" ascenderon á primeira División autonómica. Un éxito sen dúbida máis que salientable. Nestes intres, rapaces que "naceron" no club, son os responsables de ditas clases que xestionan baixo a súa responsabilidade trala supervisión da xunta directiva.

Tódolos responsables do fito histórico de ascender á Primeira División Autonómica ó club Albatros son os mesmos nenos que comezaron a xogar ó xadrez a principios do novo século, iso hai que salientar porque son da vila, non fichaxes exteriores.

Ter un equipo en primeira división autonómica para una poboación coma a da Guarda debe ser motivo de envexa e orgullo porque non moitas vila poden dicilo, e se enriba todos os xogadores son antigos alumnos do Club, formados polo Albatros, e por extensión da Guarda, soamente se pode dicir : GRACIAS !!!

Hoxe este club ten máis de corenta nenos en clase, máis de sesenta fichas federativas, e desenvolve cinco torneos anuais no contorno do Baixomiño cunha gran participación.

XOGADORES QUE FIXERON ISTO POSIBLE: Javier Castillo, Sergio lomba, Germán Vilaplana, Daniel Lomba e Antonio Castro.

Concello de A Guarda

O Concello da Guarda informa dos prazos para a consulta pública na que se solicitará a opinión dos suxeitos e as organizacións mais representativas afectados pola futura norma, con carácter previo á aprobación do Regulamento do Rexistro Municipal de Asociacións do Concello da Guarda.

A consulta pública estará aberta dende o día 20 de xullo de 2020 ata o día 31 de xullo de 2020, os eventuais interesados poderán participar remitindo as súas contribucións na sede electrónica do concello: https://aguarda.sedelectronica.gal/

Se trata de establecer o marco xurídico regulador do Rexistro Municipal de Asociacións, como instrumento que permita recoller documentalmente a realidade do tecido asociativo e de participación colectiva, dentro do marco territorial do Concello da Guarda, para coñecer a situación real das asociacións existentes, definir as liñas que impulsen a consolidación dun tecido social organizado e moderno que busque vías e se axuste mellor aos intereses dos cidadáns de hoxe, para participar e actuar nos asuntos que lles preocupan.

Para a creación do Rexistro Municipal de Asociacións no Concello da Guarda fai necesaria a aprobación dun regulamento que estableza o seu contido, finalidades, dereitos e obrigas das asociacións que soliciten a súa inscrición, así como fixar o seu obxecto, que será permitirlle ao Concello da Guarda coñecer o número de entidades existentes no municipio, os seus fins, representatividade e incidencia, para os efectos de posibilitar unha política municipal adecuada que contribúa a fortalecer o tecido asociativo do noso Concello.

Respecto da súa oportunidade, a ausencia dunha regulación municipal sobre a materia fai recomendable o inicio da tramitación do procedemento de aprobación do regulamento, para regularizar a situación obxecto do mesmo e que se poida cumprir a finalidade do Rexistro Municipal de Asociacións.

Concello de A Guarda

O Concello da Guarda presentou este martes 14 de xullo unha APP dirixida ao sector da hostalaría e restauración para a creación de cartas dixitais.

Esta APP gratuíta foi deseñada para dar apoio ao sector ante as novas medidas obrigatorias para a prevención do risco do COVID-19.

Esta aplicación facilita a creación de cartas online sempre cun funcionamento simple e mediante poucos pasos permite a xeración de QR para a visualización da carta ofertada nos establecementos e que pode ser actualizada segundo conveña ao establecemento. Ademais permitirá que os establecementos estarán localizables nun mapa interactivo.

A xestión desta aplicación é a través da web https://qr.aguarda.es/gl/ O primeiro paso é darse de alta como establecemento e despois de cumprimentar os datos poderá deseñar a información que estará dispoñible en función da oferta do local: carta, menu do día, menu fora de carta e carta de viños. Esta información poderá actualizarse en cada momento dun xeito automático e polo xestor do local. Por exemplo, se durante a fin de semana non se ofrece o menú do día tan só hai que desactivar esa opción.

Concello de A Guarda

A OMIX do Concello da Guarda oferta dúas xornadas/obradoiros especialmente pensadas para familias con nenos e nenas de 3 a 12 anos que buscan realizar actividades xuntos e ao aire libre ou para familias tamén que buscan recursos de ocio para nenos e nenas.

O día 24 de xullo realizarase "Xogos e movemento", unha acción destinada a xogar ao aire libre, realizando xogos por equipos, xogos populares, xogos de ioga etc. Para poder orientar axeitadamente cada actividade a cada rango de idade realizaranse dous grupos: Grupo de 3 a 6 anos de 18:30h a 19:30h, neste caso será imprescindible a participación ou o acompañamento dunha persoa adulta. Grupo de 7 a 12 anos, de 16:30h a 17:30h, neste caso os nenos e nenas poden quedar sen persoa acompañante se así o desexan.

O día 31 de xullo, terá lugar o "Obradoiro: manualidade natural, cabeza de pasto", nesta ocasión a proposta será a realización dunha manualidade creativa e divertida e que ademais poderán levar para a casa. Os grupos de idade participantes volven a ser de: 3 a 6 anos de 18:30h a 19:30h coa participación dunha persoa adulta e no caso de 7 a 12 anos poden acudir sen persoa acompañante, no horario de 16:30h a 17:30h.

Para os obradoiros cada familia achegará unha manta ou similar para poder xogar ou realizar o obradoiro no chan. Ademais para a manualidade natural as persoas participantes traerán: rotulador permanente negro, tesoiras, culler grande e para o grupo de maiores unha agulla de la.

Máis información e inscricións na OMIX no teléfono 676347890 ou no mail informacion@aguarda.es

Concello de A Guarda

O vindeiro sábado día 18 de xullo o Auditorio de San Benito será o escenario da representación teatral de "Lázaro de Tormes", unha actividade destinada principalmente para nenos e nenas e que terá lugar ás 20:00h da tarde.

Concello fai fincapé na realización de actividades seguras, mantendo as medidas de hixiene e seguridade vixentes en cada momento, establecendo as citas e inscricións previas para evitar aglomeracións, para a obra de teatro "Lázaro de Tormes" é preciso inscribirse no Centro Cultural da Guarda (986611850 - centrocultural@aguarda.es), haberá un protocolo COVID para garantir a seguridade e a hixiene no recinto, con asentos numerados e separados entre si.

A representación teatral de "Lázaro de Tormes" corre a cargo da Compañía Pedras de Cartón, que aterran na Guarda este sábado despois de participar no Festival de Teatro Clásico de Almagro.

Pedras de Cartón presenta a historia do Lazarillo de Tormes contada por primeira vez con máscaras e sen palabras. A compañía conta para esta tarefa con profesionáis cunha ampla traxectoria no teatro infantil e xuvenil, da man de Juan Rodríguez, socio fundador de Caramuxo Teatro. Así, Xosé Manuel Esperante, Xosé Vilarelle e Juan Rodríguez abordan dende o escenario e baixo a dirección de Pablo Sánchez e Laura Sarasola, esta coñecida peza da literatura que ademáis forma parte do currículo educativo nas escolas.

Unha comedia sen palabras para gozar en familia.

Concello de A Guarda

" A Compañía teatral Os Quinquilláns repiten as visitas teatralizadas despois do grande éxito acadado no verán de 2019, neste caso visitarán o Castro de Santa Trega todos os mércores

O Concello da Guarda repite a experiencia das visitas teatralizadas despois do grande éxito acadado no verán de 2019, a cargo da Compañía de teatro Os Quinquilláns. Cada mércores deste verán entre o 15 de xullo e o 26 de agosto, dous personaxes peculiares visitarán o Castro de Santa Trega, nunha actividade que pretende sorprender a todos os asistentes.

Estas visitas teatralizadas forman parte do programa O Camiño Aguárdate, que dentro da convocatoria O Teu Xacobeo busca a divulgación dos valores patrimoniais entorno ó camiño de Santiago. A compañía Os Quinquilláns, será a encargada de realizar esta actividade que nos transporta a época mais tardía do Castro da man da primeira muller peregrina, Exeria, quen trouxo ata a Península Ibérica o culto a Santa Trega. As visitas teatralizadas misturan a creatividade teatral, a divulgación dos valores patrimoniais entorno ó camiño e a revalorización da peregrinaxe coma forma diferente de viaxar.

O aforo de cada visita está limitado a 25 persoas, sendo obrigatorio o uso de mascarilla de protección.

Se queres acompañalos inscríbete neste formulario, indicando os teus datos.

https://forms.gle/FszaE4ocSLBGqJQZ6

Concello de A Guarda

Concello de A Guarda