O Rosal rememora os versos dunha das escritoras galegas máis insignes, Rosalía de Castro, do xeito máis orixinal posible: con arte e poesía. Alumnado de todas as idades dos centros escolares do municipio contribuirán a conmemorar o Día de Rosalía, que se celebra o vindeiro luns 24 de febreiro, achegando a todos os rosaleiros e rosaleiras a imaxe e anacos dos poemas da escritora.

Deste xeito, o alumnado de educación primaria do CPI Manuel Suárez Marquier deseñou e creou un mural feito con pezas de madeira sobre as que as e os pequenos artistas deixaron a súa impronta e a súa particular visión de Rosalía de Castro e da súa obra. Este mural quedará colocado de xeito permanente na fachada do pavillón municipal do Rosal, que recordará a figura da escritora ao longo de todo o ano. O alumnado deste centro completou a homenaxe a Rosalía con poemas e marcapáxinas que se distribuirán entre a veciñanza.

Pola súa banda, o alumnado de Secundaria da Mata realizaron debuxos interpretando a figura de Rosalía de Castro emulando a diferentes pintoras de renome. Os nenos e nenas do CRA María Zambrano e da Escola Infantil A Galiña Azul do Rosal tamén quixeron participar nesta conmemoración enchendo de cor siluetas de Rosalía de Castro con anacos dos seus poemas, uns debuxos que se repartirán por comercios e restaurantes de todo o concello para que a veciñanza poida desfrutar deles. Estes debuxos estarán dispoñibles ata a primeira semana de marzo.

O Concello destaca a importancia de levar adiante todas estas iniciativas para así homenaxear á escritora galega máis universal, precursora da poesía moderna, unha pioneira do pensamento feminista e a persoa que devolveu ao galego o seu carácter de lingua culta. Tamén quere agradecer a participación e colaboración de todos estes centros educativos.

Ao desfile polas rúas do centro súmase o carnaval de Fornelos e Novás, con actividades como a tradicional 'Corrida do galo' e as 'Frixidelas'

O Rosal prepárase para vivir tres días de troula para festexar o entroido no que raíces ancestrais convivirán coas novas tradicións. A festa comezará o próximo domingo 23 co habitual desfile de Carnaval, no que carrozas e comparsas percorrerán a partir das 11.00 horas a rúa Xulio Sesto, desde a Rotonda da Feira e a rúa de Ramón Franco ata o cruce coa Lomba. A orde de saída de persoas e grupos participantes no desfile será:

- Disfraces individuais modalidade infantil.
- Disfraces individuais modalidade xuvenil-adulto. Para facilitar o transcurso do desfile, lémbrase a todos os rosaleiros e rosaleiras que non se poderá estacionar nas rúas Xulio Sesto e Ramón Franco dende as 08.00 ata as 15.00 h do domingo.

Ese será o pistoletazo de saída a un carnaval que continuará xa o domingo pola tarde nos barrios cunha programación cargada de actividades para toda a veciñanza.

Fornelos comezará o seu tradicional festexo do entroido o domingo ás 16.30 h con pasarrúas polo barrio do grupo de gaitas A Boalleira e, a partir das 17.00 h, actuacións para nenos e nenas con inchables e toro mecánico. Dende as 21.00 h ata a madrugada, gran verbena amenizada polas agrupacións Sorala e Nievla. O luns 24 a partir das 16.00 h a Praza de Fornelos converterase no escenario da tradicional 'Corrida do galo' e a partir das 21.30 h de novo verbena con Saudade e D'Paso. O martes 25 será a quenda das 'Frixidelas' a partir das 16.00 h, que rematará con degustación para todos e con actuación sorpresa ás 19.30 h.

Pola súa banda, Novás arrancará o seu particular carnaval coa subida do maio (domingo 23, ás 16.30 h), unha tradición centenaria recuperada neste barrio e que dará paso aos xogos populares e ao chocolate quente e á rosca para todo o público. O luns 24 tamén a 'Gran corrida do galo' será a protagonista, mentres que o martes 25 o será a tradicional 'Frixidela' con pan de millo e viño para todos a partir das 18.00 h. A traca final, a música a cargo de Roberto Caco.

O Concello do Rosal quere recoñecer o gran traballo que fai a veciñanza para que Carnaval e Entroido tradicional convivan dun xeito tan harmonioso nunha festa "con grande arraigo, trascendencia e seguimento social, que alimenta o bo ambiente e materializa esa retranca que tanto nos caracteriza".

A alcaldesa do Rosal, Ánxela Fernández, visitou este martes ao presidente da cámara municipal de Vila Nova de Cerveira, Fernando Nogueira, para a presentación institucional destes dous concellos veciños que contan cunha fronteira común. Trátase da primeira reunión institucional entre ambos os dous mandatarios, na que Nogueira e Fernández destacaron o potencial dos dous municipios, territorios que contan con algunhas complementariedades fortalecidas pola súa proximidade xeográfica e polas posibilidades que ofrece a cooperación transfronteiriza.

Esta reunión supón o punto de partida para esa colaboración transfronteiriza e para o desenvolvemento de accións de futuro nas que os dous municipios traballen conxuntamente. Ambos mandatarios destacaron a importancia de tecer lazos entre as veciñanzas dos dous concellos e de aproveitar as potencialidades de cada un, como o destacado papel que xoga o tecido asociativo no Rosal.

Ánxela Fernández convidou ao presidente da cámara de Cerveira a visitar o Rosal en próximas datas e así continuar traballando nas relacións transfronteirizas entre ambos concellos.

O Concello do Rosal organiza para o vindeiro mes de marzo un curso de cociña no que se aprenderá a facer pratos de culler aproveitando os recursos da zona e produtos propios da tempada de inverno. O curso celebrarase todos os luns do próximo mes (2, 9, 16, 23 e 30 de marzo) en horario de mañá, de 09.30 a 12.00 horas, na cociña municipal situada fronte ao pavillón municipal.

O curso, dirixido a todos os públicos e con 12,5 horas totais de duración, terá un custo de 35 euros por persoa. O prazo de inscrición xa está aberto. Prazas limitadas.

Todas as persoas interesadas en participar nesta iniciativa poden pedir máis información no teléfono 986 625 000.

Este programa da Deputación de Pontevedra inclúe 20 h de formación en liña e un taller práctico o 11 de marzo no centro de formación ocupacional A Mata

Impulsar a creación de plantacións de froitos do bosque ecolóxicos e de calidade e mellorar a capacitación e a profesionalización das persoas emprendedoras que queiran dedicarse a esta actividade. Estes son os obxectivos principais de 'DepoFroito', unha acción formativa de balde posta en marcha pola Deputación de Pontevedra e que chega ao Rosal o vindeiro mes de marzo. O curso, destinado a persoas empregadas ou desempregadas inscritas como demandantes de emprego, contará con 20 horas de formación en liña relacionadas con accións de innovación social sobre o emprendemento ou a internacionalización neste sector e cun taller informativo que terá lugar o 11 de marzo no centro de formación ocupacional da Mata, no Rosal, en horario aínda por determinar.

A través dunha experiencia innovadora de formación e de acompañamento específico, as persoas participantes coñecerán as oportunidades de negocio que ofrece o sector dos froitos do bosque e afondarán en aspectos como a tramitación de axudas e subvencións ou a elaboración de plans de viabilidade técnica, económica e financeira, entre outros. Todo a través de dúas innovadoras ferramentas en liña: un simulador de negocio sobre o cultivo e a comercialización de froitos do bosque e unha aplicación para facilitar a internacionalización das vendas cunha serie de recomendacións de actuación. Ademais, cada persoa participante contará cun servizo de asesoría e consultaría en liña gratuíto coa que sexa máis doado xestionar a creación e mantemento de empresas relacionadas co cultivo, elaboración e transformación de froitos do bosque.

Con iniciativas como 'DepoFroitos' búscase "formar aos rosaleiros e rosaleiras e fomentar as ideas de negocio que sirvan para promover o desenvolvemento sustentable da nosa contorna e crear emprego de calidade. Temos que ofrecer solucións creativas e innovadoras aos retos que temos diante, como pode ser a xeración de postos de traballo con medidas sustentables e respectuosas co medio ambiente dando valor engadido aos produtos cultivados no municipio", salientou a alcaldesa do Rosal, Ánxela Fernández.