O CEIP Mestre Manuel García acollerá unha ludoteca de entroido para facilitar a conciliación familiar durante os días de vacacións escolares. A iniciativa está organizada por Ma Nunú Conciliación Familiar e conta coa colaboración do Concello de Oia.

As actividades están orientadas aos nenos e nenas de entre 3 e 12 anos. Do 24 ao 26 de febreiro, os pequenos e pequenas participantes poderán divertirse no seu tempo libre facendo traballos manuais e gozando con xogos populares, maquillaxe e disfraces.

A ludoteca de entroido ten un prezo de 25 euros para os tres días, aínda que tamén existe a opción de ir días soltos (10 euros cada día). As prazas son limitadas. Máis información e inscricións en info@manunu.es e no teléfono 619.96.11.80

Concello de Oia

O Concello de Oia contratará a un total de 8 persoas desempregadas ao abeiro da liña de emprego do Plan Concellos 2020 da Deputación de Pontevedra.

En concreto, ofértase unha praza de condutor/operador de maquinaria forestal (10 meses), un operario de recollida de lixo (5 meses), dous albaneis/oficiais de primeira (9 meses) e catro peóns forestais (9 meses).

Os contratos serán a xornada completa. Poderán optar a eles as persoas desempregadas inscritas na Oficina de Emprego de Baiona, a cal se encargará da preselección das beneficiarias.

Concello de Oia

A lápida dun abade do Mosteiro de Santa María de Oia que permanecía nun pequeno alpendre do barrio do Arrabal, reempregada como lintel, xa descansa na igrexa do conxunto monacal. A estrutura foi trasladada este martes nun proceso que contou con supervisión arqueolóxica a fin de garantir a integridade e conservación do ben.

Esta lauda sepulcral, a única ata o de agora coñecida dun abade do cenobio cisterciense de Oia, formaba parte dunha pequena construción do barrio histórico do Arrabal, a poucos metros do convento cisterciense. Xa naquel emprazamento podíase distinguir un gravado coa forma de báculo abacial e máis unha inscrición que remitía ao século XIII.

A precaria situación estrutural na que se atopaba o alpendre, susceptible de acabar danando a lápida, facía necesario buscar unha nova localización que garantise a conservación do ben patrimonial. Ao mesmo tempo, houbo que adoptar unha solución técnica para o traslado do elemento patrimonial en condicións de seguridade.

Unha vez realizadas as correspondentes xestións coa propiedade do inmoble e obtido o visto bo de Patrimonio da Xunta de Galicia, varios operarios procederon a primeira hora desta mañá ao traslado da estrutura desde a súa localización ata a igrexa parroquial de Santa María de Oia. Os traballos foron supervisados pola arqueóloga Elisa Pereira e desenvolvéronse sen ningún tipo de incidente.

Doazón ao Concello

O Concello de Oia recibiu a lápida como doazón das propietarias do alpendre, Joaquina Mariño e Carmen Blanco, e a partires de aí encargouse de solicitar os permisos e tamén se fixo cargo do traslado.

A partires de agora, a lápida permanecerá na igrexa parroquial, que forma parte do conxunto monacal declarado BIC no ano 1931. Cóntase coa colaboración do párroco, Daniel Goberna, para a adecuación do entorno no que a lauda quedará exposta.

A lápida dun abade do século XIII

Esta estrutura foi atopada en 2013 de xeito fortuíto por Lorena González, veciña do Arrabal, sendo o historiador Fernando Javier Costas Goberna quen a identificou como lápida. A raíz do achado e das actuacións promovidas pola Asociación de Amigos do Mosteiro de Oia (ACAMO), saíron á luz as primeiras hipóteses sobre a datación deste ben patrimonial e a identificación do abade ao que pertencía.

Concretamente, e segundo a interpretación que fai a historiadora Ana Paula Leite Rodrigues, esta lauda correspondería ao frade Lourenzo, décimo terceiro abade do Mosteiro de Oia. En canto á cronoloxía, a data do falecemento que figura na epigrafía sería o 11 de xullo de 1277.

Descoñécese o momento no que a lápida abacial pasou a formar parte do alpendre no que foi achada, se ben os estudos históricos feitos ata o de agora apuntan á posibilidade de que o reemprego da lousa fose produto dos longos procesos de desamortización de bens das ordes relixiosas que se desenvolveron nos séculos XVIII e XIX.

A nova localización da lauda sepulcral permitirá unha mellor visualización dos gravados e inscricións e, polo tanto, un estudo máis polo miúdo deste importante elemento patrimonial fortemente vinculado á historia de Oia.

Concello de Oia