Esta fin de Semana vimos de celebrar as Festas do Pilar e do Cabaqueiro no Rosal.

Foron numerosos os Rosaleiros e Rosaleiras que se achegaron ata a praza do calvario para desfrutar de toda a programación, que foi ampla e variada, con música, recoñecemento Cabaqueiros, exposicións e baile.

Comezamos o venres con música coas actuacións de "Andhrea and The Black Cats" e "Os Residuos Atractivas".

O Sábado tivemos á Coral da Agrupación e á banda pola mañá e pola tarde contamos coa actuación de "Trío Refugallo", na que participaron os máis cativos. Seguidamente, gozamos dun emotivo recoñecemento ós nosos cabaqueiros e rematamos a xornada cun gran Concerto da banda da Agrupación Musical do Rosal con Suso Vaamonde que superou calquera expectativa de asistencia.

Por último, o domingo finalizamos unha fin de semana chea de eventos co Festival Folclore no Camiño, no que puidemos desfrutar do baile que nos une a ambas beiras do Río Miño.