O deporte non dará tregua no Rosal nos próximos días. O municipio prepárase para vivir unha intensa semana na que ciclismo, fútbol e balonmán serán protagonistas con tres trofeos que combinarán deporte base, competición, emoción e espectáculo, reforzando unha axenda deportiva que medra da man dos clubs e entidades locais.

A alcaldesa, Ánxela Fernández Callís, salienta que "esta intensa programación é un reflexo da enorme vitalidade deportiva que temos no Rosal e, sobre todo, do traballo constante que realizan os nosos clubs durante todo o ano". A rexedora destaca tamén "a importancia de seguir apoiando entidades que crean canteira, fomentan hábitos de vida saudables e conseguen que o deporte sexa tamén un espazo de convivencia e de comunidade".

A primeira gran cita chegará este sábado 29 de agosto coa celebración do XXXIV Trofeo Pista de As Faias, organizado polo Club Ciclista O Rosal co apoio do Concello e da Comunidade de Montes Veciñais en Man Común de San Xoán de Tabagón. A partir das 16.00 horas, as instalacións de adestramento do club recibirán ás escolas de ciclismo galegas para disputar unha proba integrada no calendario da Federación Galega de Ciclismo.

A competición reunirá ciclistas das categorías promesas, principiantes, alevíns, infantís, cadetes e júnior feminina, convertendo novamente a pista das Faias nun punto de encontro para a canteira do ciclismo galego. Para facilitar a organización da proba, o acceso ao aparcadoiro interior permanecerá aberto entre as 12.00 e as 15.00 horas. Unha vez pechado, non se poderá abandonar o recinto ata que o indique a organización e, en ningún caso, antes de finalizar a competición.

Ese mesmo sábado 29, o protagonismo pasará das dúas rodas ao balón coa XV edición do Trofeo Vila do Rosal, organizado pola UD Ribera coa colaboración do Concello. O encontro disputarase ás 18.30 horas no campo de fútbol da Mata e servirá para inaugurar a tempada 2026/2027 do club rosaleiro, que se medirá ao San Miguel CF.

O balonmán de máximo nivel, broche final

A semana deportiva culminará cunha nova edición do Trofeo Concello do Rosal, organizado polo Valinox Novás en colaboración co Concello. O xoves 3, ás 20.30 horas, o Atlético Novás enfrontarase ao Frigoríficos del Morrazo nun partido que permitirá volver gozar de balonmán de primeiro nivel.

Nesta ocasión, o encontro disputarase no Pavillón de Vila Nova de Cerveira, con entrada de balde, nunha cita que volverá reunir afección e deporte arredor dunha das disciplinas con maior tradición e arraigo no Rosal.

O concelleiro de Deportes, José Carlos Martínez Crespo, pon en valor a variedade das propostas: "en poucos días teremos ciclismo de base, fútbol e balonmán de alto nivel, tres disciplinas cunha enorme tradición no noso municipio. É unha mostra da fortaleza do tecido deportivo rosaleiro e da capacidade dos nosos clubs para organizar citas que mobilizan deportistas, familias e afección".