" Centos de persoas soben ata o cumio do monte Santa Trega para honrar á súa patroa
16/9/25 20h

O próximo martes 23 é festivo local na Guarda, coincidindo co día de Santa Trega. Como cada ano, centos de guardeses e guardesas volverán subir ao monte de Santa Tegra para celebrar o día na súa honra. Como actos relixiosos haberá misas rezadas na capela de Santa Trega ás 8:00, 9:00 e 10:00 da mañá.

Aínda que a gran celebración relixiosa será ás 11:30h, cunha misa solemne con ofrenda e cunha procesión posterior. Na procesión é habitual ver persoas co traxe tradicional e que mostran produtos caseiros que ofrecerán despois nas poxas.

Estas poxas rematan co sorteo final dunha monumental tarta con regalo sorpresa. Para rematar a xornada, moitas familias fan unha comida campestre, acompañadas de música e o baile que xorden de xeito espontáneo para desfrutar deste día festivo.

Concelho de A Guarda

A XXXVII Festa da Zorza celébrase este venres 19 na Gándara para desfrutar das últimas xornadas do verán. A partir das 6 da tarde xa se poderán degustar as primeiras racións de zorza.

Esta ano, preténdense repartir ata 680kg de zorza entre todos os asistentes que veñen de todo o Baixo Miño.

Como é habitual a ración de zorza inclúe pan e unha bebida (auga ou cunca de viño) e terá un prezo popular de 10€. Ao rematar, haberá queimada co seu conxuro correspondente. Para continuar coa festa a partir das 00:00h haberá festa con djs.

Ademais, non vos preocupedes pola chuvia, pois o recinto está cuberto cunha carpa.

Concelho de A Guarda

O Salón de Plenos acolle o próximo mércores 17 unha sesión de memoria histórica, organizada pola Asociación para a Recuperación da Memoria Histórica do Campos de Concentración de Camposancos e a Fosa Común de Sestás, en colaboración co Concello da Guarda.

A sesión estará guiada por Xesús Alonso Montero, catedrático emérito da Universidade de Santiago de Compostela. A conferencia leva por nome "Páxinas literarias dos presos republicanos en San Simón", centrándose a sesión nesta illa da ría de Vigo.

A conferencia dará comezo ás 19:00h no Salón de Plenos da Casa dos Alonso e rematará coa actuación do coro "Cantos de Liberdade".

Concelho de A Guarda

A campaña das "Rutas dos Peixes Protectores" de Interfish chega á Guarda. Trátase dunha foodtruck que dá a coñecer estes peixes con degustacións de receitas de quella, marraxo e peixe espada.

Tras comezar o 25 de xullo o seu percorrido por diferentes puntos da costa galega, este venres e sábado a foodtruck estará na Guarda para poder degustar estes produtos de xeito gratuíto.

Toda aquela persoa que queira probalo poderá facelo na praza de Avelino Vicente de 19 a 22h, tanto hoxe, venres 12, como mañá, sábado 13.

Interfish

Trátase dunha asociación constituída co obxectivo de representar a toda a cadea de valor do produto pesqueiro (sector extractivo, transformador e comercializador), que nace en 2019. Está formada por Organización de Produtores Pesqueiros do Porto de Burela (OPP-07), Organización de Produtores de Pesca do Porto e Ría de Marín (OPROMAR), Organización da Palangreiros Guardeses (ORPAGU) e Conxemar.

Concelho de A Guarda

O Grupo Municipal Socialista quere advertir á veciñanza dunha realidade que xa ninguén pode ignorar: o alcalde da Guarda, Roberto Álvarez Carrero, minte. Minte con descaro e faino constantemente.

Nestes días vimos como, a través das redes sociais do Concello, aseguraba que "non houbera avances significativos" na apertura da rúa Baixo Muro - Ireira ata a compra da parcela realizada agora. Iso é unha MENTIRA en maiúsculas.

Cando Carrero chegou ao goberno en 2023 xa o PSOE xestionara a modificación puntual do Plan Xeral que era obrigatorio facer para poder abrir a rúa. Xa lle quedara o proxecto redactado e conseguidos todos os permisos de Patrimonio. Incluso tiña diñeiro para facelo, porque se deixara reservado.

Sen todos eses trámites previos, a apertura sería imposible. E todo iso estaba feito antes de que Carrero chegase ao goberno, e a pesar de ter todo iso avanzado retrasou esta obra dous anos, e agora quere poñerse medallas. É incrible a falta de honestidade deste rexidor.

Os feitos están aí, e son públicos, e poden comprobarse na web do concello en noticias publicadas en 2019, 2020 e 2022.

Pero o problema non é só esta mentira. O problema é que non é a primeira, nin a segunda. Xa nos enganou co tema dos cobros da Deputación, tamén enganou cando afirmou que o Concello quedara sen fondos tras o paso dos/as socialistas, e agora volve facelo con este asunto. Sempre o mesmo patrón: negar a evidencia e manipular a realidade.

Un alcalde pode equivocarse, pode ter outra visión, pode mesmo discrepar. O que non pode facer é mentir sistematicamente á cidadanía. Porque cando se perde a confianza, pérdese todo.

Nós non imos permitir que se reescriba a historia ao gusto de Carrero. A apertura desta rúa é froito de anos de traballo e planificación, e a veciñanza ten dereito a coñecer a verdade.

A Guarda precisa un goberno serio, honesto e que mire polos intereses comúns, non un alcalde que fai da mentira o seu xeito de gobernar.

PSOE de A Guarda

O Concello da Guarda pon en marcha un proxecto para mellorar a xestión dos residuos no municipio grazas á concesión a este concello das axudas da Xunta de Galicia financiadas con fondos europeos- NextGenerationEU.

A iniciativa céntrase na implantación do contedor marrón ou 5º contedor para a recollida separada dos residuos orgánicos no núcleo urbano do concello e nos grandes produtores deste residuo.

O que se recolla nos contedores marróns terá como destino a Planta de compostaxe de Vilanova de Arousa para a fabricación de compost, un excelente fertilizante para o solo.

O plan contempla campañas de sensibilización á veciñanza, centros educativos e diversos colectivos, comenzando coas visitas porta a porta a domicilios e establecementos hostaleiros e comerciais, ofrecer información e resolver as dúbidas que poidan xurdir.

O obxectivo é incrementar a recollida e aproveitamento de residuos orgánicos contribuíndo á sostibilidade ambiental e económica do concello.

O programa estará activo ata finais de outubro de 2025. Con esta actuación, A Guarda dá un paso máis no cumprimento da Lei 7/2022 de residuos e solos contaminados e reforza o seu compromiso coa economía circular e coa loita contra o cambio climático.

Concelho de A Guarda

" Manuel Cerviño presenta o seu libro "Ti, a miña grande obra" e a exposición "Mesturas"
14/9/25 10h

A Casa dos Alonso acolle a última exposición antes do remate do verán, a exposición "Mesturas" de Manuel Cerviño. O artista de Bueu tamén presentará o seu libro "Ti, a miña grande obra".

Esta obra publicouna no ano 2020, e a meirande parte das súas palabras están baseadas en sentimentos vividos: tristuras, paixón... Segundo o propio autor, a orixe está nun día en que rompeu unha relación tormentosa. A raíz desta experiencia comezou a escribir a súa rabia interior e todo canto sentía en poemas que agora podemos desfrutar nesta obra.

Ademais da súa obra literaria, Manuel Cerviño presenta a súa exposición de pintura Mesturas". Cerviño descubriu a súa paixón pola pintura vivindo en Ons, onde o mar e o entorno o inspiraron profundamente. Os seus cadros caracterízanse pola temática das paisaxes de costa e polo tratamento da cor.

A presentación do seu libro e a inauguración de "Mesturas" terá lugar o venres 12 ás 20:00h na Casa dos Alonso. Despois, a exposición estará aberta a visitas de luns a venres de 9 a 14h ata o próximo mércores 24 de setembro.

Concelho de A Guarda

" O Concello da Guarda colabora con FOCO nestes obradoiros de balde para todas as idades
14/9/25 10h

O Concello da Guarda, en colaboración coa asociación FOCO, organiza novos obradoiros de teatro para nenos e nenas de 6 a 12 anos durante o curso 2025/2026, é dicir, para o alumnado de Educación Primaria.

Serán espazos creativos, dinámicos e divertidos onde pasalo ben, desfrutar, aprender a empregar a voz e o movemento, xogar e coller confianza. Todo o mundo é benvido a unirse para facer amizades e pasalo xenial.

Os obradoiros terán lugar no Centro Cultural da Guarda, os martes lectivos do curso, de 16:00 a 17:30. Serán totalmente de balde e non é necesaria experiencia nin habilidades especiais; é unha oportunidade perfecta para aprender.

As inscricións estarán abertas do 10 ao 25 de setembro na seguinte ligazón: https://forms.gle/cDtxYSSkb7TVBt6F8 .

Ademais, en FOCO, teñen máis obradoiros dispoñibles para outras idades durante todo o curso, tamén gratuítos, nos seguintes horarios:

o De 13 a 17 anos: Os venres de 18:00 a 20:00
o De 18 a 30 anos: Os sábados de 12:00 a 13:30
o Máis de 60 anos: Os mércores de 18:00 a 19:30

Concelho de A Guarda

" A III Marcha de Enduro BTT reúne este domingo a 125 participantes
14/9/25 10h

A 8 de setembro presentouse a III Marcha de Enduro BTT, co alcalde da Guarda, Roberto Carreo, o concelleiro de Deportes, Celso Fariñas e os organizadores da marcha, Insitu Ciclismo.

O domingo pola mañá, a Baixomiño Enduro Experience tomará os montes da Guarda. Este ano vén cun par de novidades que van a dar máis visibilidade e maior espectáculo. Será a primeira edición que comezará e rematará no auditorio de San Benito, polo que este ano haberá unha zona urbana nun dos tramos para dar maior espectáculo.

Un tramo será cronometrado para poñer a proba as cualidades físicas e de habilidade dos participantes. Trátase dunha proba aberta para todos, tanto os federados como os que non (con seguro para ese día) e así poder desfrutar todos dos montes da Guarda. En total, haberá uns 125 participantes.

Esta proba terá lugar polos Montes Torroso e Santa Trega cun percorrido aproximado de 25km, con 1030m de desnivel acumulado que permitirán desfrutar de 5 tramos de enduro fluídos con zonas espectaculares e vistas inmellorables do entorno da Guarda.

Concelho de A Guarda