O Concello de Oia desenvolveu un importante proxecto de mellora no sistema de alumeado público en distintos puntos das parroquias de Burgueira e Loureza. A través do programa de desenvolvemento urbano sostible DUS 5000, un total de 346 luminarias foron substituídas por outras novas, dotadas con tecnoloxías LED e que permiten aforros enerxéticos do 78,09% respecto da instalación antiga.

O proxecto de mellora de eficiencia enerxética desenvolveuse nos núcleos da Aldea, Vilariño, O Campo, Bonaval, Refoxos, Mavia, Santa Comba, Acevedo Grande e Acevedo Pequeno; onde se procedeu á modernización das luminarias e á renovación e acondicionamento dos centros de mando. Así mesmo, nos cadros eléctricos instaláronse proteccións contra sobretensións e reloxos astronómicos para regular o acendido.

As accións de mellora tamén incluíron a renovación de tramos de cableado aéreo e soterrado que estaban deteriorados e a substitución de postes e brazos danados, entre outras intervencións.

Ademais do aforro enerxético e da redución da pegada enerxética, esta modernización do sistema de alumeado supón unha mellora da calidade de vida para a veciñanza, que ve melloradas as condicións de iluminación da vía pública.

A actuación global supuxo un investimento de 171.511,45 euros (incluíndo o subministro de luminarias, redacción do proxecto, dirección de obra e asesoramento para a subvención). Deste total, 131.900,96 euros foron subvencionados a través do programa DUS 5000 (medida 4 de loita contra a contaminación lumínica, alumeado eficiente e intelixente, Smart Rural e TIC) que xestiona o IDAE, entidade dependente do Ministerio para la Transición Ecológica y el Reto Demográfico. O resto do investimento asumiuse con fondos propios municipais.

A iniciativa DUS 5000 é un programa de axudas dirixido a proxectos singulares locais de enerxía limpa en municipios en situación de reto demográfico, o cal se desenvolve no marco do Programa de Rexeneración e Reto Demográfico do Plan de Recuperación, Transformación e Resiliencia-Financiado pola Unión Europea-Next GenerationEU.

Concelho de Oia