O Concello do Rosal segue dando pasos na súa aposta por un municipio máis inclusivo e accesible para todas as persoas e en todos os eidos da vida. Neste camiño, o Goberno municipal vén de rematar as obras de mellora da accesibilidade nos vestiarios do campo de fútbol municipal A Mata, "garantindo así o acceso a toda as persoas e convertendo de forma progresiva todas as dependencias municipais que aínda non o eran en espazos inclusivos", como sinala a alcaldesa, Ánxela Fernández Callís.

Situados nunha edificación anexa na parte posterior das bancadas do campo de fútbol, o espazo estaba dividido en sete vestiarios, catro deles comunicados de dous en dous nos espazos das duchas, no que se reparten os equipos locais, visitantes e árbitros. Para salvar as dificultades de acceso existentes anteriormente, con estas obras estableceuse unha nova distribución do conxunto dos vestiarios, eliminando os espazos dedicados ao almacenamento de material de adestramento e o último dos vestiarios existentes.

Con esta nova distribución todos os vestiarios pasaron a ser independentes, aumentando o número de duchas dispoñibles e xerando cabinas accesibles que tamén funcionan como aseos accesibles. Ademais, instalouse unha porta de paso corredeira entre os vestiarios 1 e 2 e os 3 e 4 de forma que poidan comunicarse interiormente en caso de necesidade para convertelo un espazo único co dobre de capacidade. Ademais, abríronse novas portas en dous dos vestiarios e na zona de árbitros ampliouse o paso libre da porta de acceso ao interior.

As obras contaron cun investimento de case 116.000 euros dos que case 74.000€ foron financiados con fondos propios do Concello do Rosal e outros 42.000 euros foron subvencionados a través do Plan Concellos 2022 da Deputación de Pontevedra.

Este é o primeiro paso para conseguir a accesibilidade total no campo de fútbol municipal A Mata. O Concello xa está a traballar no proxecto do cambio de céspede no campo, unha necesidade importante detectada no traballo conxunto coa UD Ribera para a reforma das instalacións. Tras este cambio, o proxecto continuará coas obras de mellora da accesibilidade na zona de entrada ás instalacións.

O Concello puxo en marcha a campaña 'Traballando co lixo' para implicar a rosaleiros e rosaleiras nunha correcta xestión dos residuos dende a infancia

Aprender dende cativos e cativas a reciclar os diferentes residuos. Ese é o obxectivo de 'Traballando co lixo', unha campaña posta en marcha polo Concello do Rosal coa que se busca implicar a rosaleiros e rosaleiras nunha correcta xestión dos residuos dende a infancia.

"É moi importante que dende moi pequenos e pequenas poidan ir aprendendo que o primeiro paso para un axeitado reciclaxe de residuos é saber recoñecer onde debe ir cada resto. Aprendelo na aula, rodeado dos seus compañeiros e compañeiras, en equipo, é unha boa experiencia para nenos e nenas", destaca a alcaldesa, Ánxela Fernández Callís.

Con este proxecto vanse percorrendo todas as aulas de educación primaria dos centros educativos do Rosal para traballar en común as cuestións relacionadas co lixo e coa reciclaxe. Así, ao longo da actividade, os nenos e nenas aprenden que deben botar no colector amarelo, "ese que sempre se di de plásticos pero que realmente é de envases", como lles explica durante os encontros o concelleiro de Participación Veciñal e Voluntariado, Ramón Fernández Leal.

A través de diferentes actividades, o alumnado repasa aqueles elementos que deben levarse ao Punto Limpo aproveitando as lembranzas da visita realizada ás instalacións. Ademais, tamén seleccionan diferentes tipos de residuos e falan de outros tipos de lixo moitas veces máis difíciles de catalogar para poder desbotar, como as cápsulas de café, os medicamentos ou os restos orgánicos.

Este sábado 18 traerán ao auditorio municipal o espectáculo 'Noé, Noemí e Noemilia. Sete animais e a súa familia'

O auditorio municipal do Rosal prepárase para acoller esta fin de semana un encontro interactivo entre as familias e a banda de música. A Banda da Agrupación Musical do Rosal acompañará a Belén Otxotorena na interpretación de 'Noé, Noemí e Noemilia. Sete animais e a súa familia', un innovador conto musical inspirado nun divertido poema colombiano e nunha das historias máis antigas da humanidade, a Arca de Noé.

Otxotorena dará vida a unha obra na que as composicións de Andrés Valero e de Óscar Navarro serán as protagonistas. Unha historia que conta as vivencias de Noé, Noemí e Noemilia, que vivían placidamente pescando cada un nun lugar diferente do mundo ata que corenta días e corenta noites chovendo a esgalla os obrigaron a subirse a unha arca xigante.

Con estudos musicais e de teatro, Belén Otxotorena é escritora, coautora de contos e guías didácticas e escritora de relatos musicais para toda a familia. Ten participado en espectáculos con moitas bandas musicais por toda España, así como coa Orquestra Sinfónica de Galicia e a Orquestra Sinfónica de Castela e León. Aínda que o que sen dúbida a caracteriza é a súa emoción ao subir ao escenario e o seu desexo de espertar a imaxinación de grandes e cativos e cativas.

Este conto musical chega ao auditorio municipal o sábado 18 de marzo ás 20.30 horas. O prezo da entrada será de 2 euros e poderán mercarse no propio auditorio, en Milar-Teleson e en Puntera Zapatos.