O Concello destaca a grande acollida das actividades organizadas para as case 200 rapazas e rapaces participantes

Coñecer un pouco máis a natureza dun xeito ameno, innovador e divertido. Ese era un dos obxectivos dos campamentos de verán no Rosal, nos que arredor de 200 nenos e nenas "puideron desfrutar dunha alternativa de lecer lúdica e educativa durante as súas vacacións estivais ao tempo que se favorecía a conciliación familiar e laboral aos rosaleiros e rosaleiras", explica a alcaldesa, Ánxela Fernández Callís.

O Concello destaca a grande acollida das actividades organizadas ao longo dos meses de xullo e agosto ao abeiro dos campamentos. Onte despediuse o campamento municipal, que tiña como temática central os animais e no que rapaces e rapazas xogaban o papel de observadores. "Grazas a esta dinámica, cada semana as e os participantes investigaban sobre un diferente e, tras pasar varias probas, ao final da semana incluían un novo insecto nun mural conxunto. Un xeito diferente e moi divertido de seguir aprendendo ao tempo que desfrutan do seu lecer", salienta a rexedora.

Entre as actividades desenvolvidas este verán dentro dos campamentos, os nenos e nenas gozaron especialmente coa festa de disfraces, coas festas de auga e de pixamas, cos xogos tradicionais ou co seu propio concurso Got talent. Tamén tivo grande éxito entre todos eles e elas os talleres de galletas e limoada, as sesións de ioga, os xogos musicais, as xincanas e retos e as visitas como 'Baisenpulgas', 'Ti es un bo peixe', 'DGT' e 'Fai click ao teu bocata'. Ademais, durante os campamentos fixéronse varias saídas á contorna como ao parque do Sobreiral, ás Aceñas, aos muíños do Folón, ao velódromo, aos ríos Urgal e Padín, ao parque de Pías e á praia de Eiras.

En definitiva, dous meses de "xogos e saídas didácticas combinadas con actividades creativas cos que espertar a curiosidade dos nenos e nenas e darlles a coñecer un pouquiño máis sobre o seu concello. Para nós é un orgullo velos a todos desfrutar e con ganas de repetir na vindeira edición".

O Concello pon en marcha unha programación na que haberá humor, maxia, danza, literatura e monicreques

O Rosal despide o verán cunha programación cultural pensada para todas as idades e para todos os gustos. O Concello xa ten listo para o mes de setembro un amplo programa cultural no que o humor, a maxia, a danza, a literatura e os monicreques serán os grandes protagonistas. "Este mes gozaremos con cinco actividades coas que encher de lecer o noso municipio e coas que, de novo, levar a cultura aos barrios", salienta a alcaldesa, Ánxela Fernández Callís.

A axenda cultural comezará este mesmo sábado 3 de setembro co humor e a retranca de Os netos do Rosal, unha tarde de comedia cos rosaleiros Ángel e Iker ás 20.00 horas no auditorio municipal.

A vindeira semana haberá sesión dobre. O sábado 10 de setembro será a quenda de Cayetano Lledó, que se converterá en Sherlock Holmes nun espectáculo teatral con comedia, maxia e moito humor para descubrirnos o caso do diamante Patterson. Será ás 20.00 horas no auditorio municipal. O domingo 11 de setembro a programación cultural leva a danza á Praza do Maio de Tabagón coa actuación da Asociación Ghorghalado e 'A nosa música. O noso baile'. Será a partir das 11.15 horas.

Por outra banda, o sábado 16 de setembro a Biblioteca municipal acollerá ás 20.00 horas a presentación de 'Aldea Buxán', o último libro do escritor Francisco Álvarez, Koki. A programación rematará o venres 30 de setembro cunha actividade para público infantil no parque do Sobreiral: 'Xela contra o dragón', de Títeres Cachirulo, a partir das 18.00 horas.

A alcaldesa agradeceu a implicación da veciñanza no acto de participación social de presentación do proxecto, no que puideron expoñer as súas suxestións

O Concello do Rosal continúa a súa aposta por proxectos que permitan un desenvolvemento integral do municipio, poñendo en valor os seus espazos e o seu patrimonio e situando de novo ás persoas no centro. A alcaldesa, Ánxela Fernández Callís, presentou nun encontro coa veciñanza o proxecto de mellora e transformación da contorna das Eiras, unha zona "cun elevado valor natural e patrimonial que vai dende a Ribeira ata a Madalena con actuacións que resolven problemáticas concretas, recuperan o patrimonio cultural e melloran os accesos, os camiños, as sendas e, por suposto, a calidade de vida da veciñanza e das persoas visitantes".

O Concello celebrou un acto de participación social aberto no que os veciños e veciñas achegaron ideas e suxestións que incorporar ao proxecto. "Non podemos máis que agradecer a implicación e compromiso dos rosaleiros e rosaleiras, xa que para nós é moi importante poder facer unha escoita activa dos nosos veciños e veciñas, porque son os que mellor coñecen a realidade da contorna", recalca a rexedora.

A transformación das Eiras comezará pola mellora da accesibilidade da Igrexa e da súa contorna deteriorada. O proxecto integral busca dar prioridade ás persoas, mellorando as condicións de accesibilidade peonil para reconectar o Miño coa Madalena e creando espazos de calidade e máis seguros, con mobiliario urbano que xere pequenas zonas de estancia e reducindo a velocidade e mudando pavimentos. Ademais, "atendendo á realidade climática, empregaranse materiais de KM0, especies vexetais autóctonas sen regos e pavimentos permeables e semipermeables que melloren a relación entre o medio e as persoas que o habitan". Ese respecto polo territorio estenderase tamén aos materiais empregados, con formas e cores inspirados na paisaxe e no propio medio que mellorarán a accesibilidade e se difuminarán entre o patrimonio existente.

Dende o Concello estase a levar a cabo un importante traballo para captar fondos externos cos que desenvolver estes proxectos que buscan "transformar O Rosal priorizando a sostibilidade, a calidade de vida e a recuperación de espazo público para as persoas, como marcan os valores europeos de cara ao futuro", explica Fernández Callís.

Organizado pola Asociación de Persoas Maiores do Rosal en colaboración co Concello e coa financiación do proxecto Depo en Marcha da Deputación de Pontevedra

O Rosal acollerá durante os meses de outubro, novembro e decembro un curso de pilates pensado para promover o envellecemento activo, favorecer a cooperación social e promover espazos de encontro e o intercambio de experiencias entre as persoas de maior idade. A Asociación Cultural Persoas Maiores O Rosal pon en marcha en colaboración co Concello este taller de 30 horas no que poderá participar calquera persoa interesada maior de 50 anos.

O curso forma parte do proxecto Depo en Marcha 2022 da Deputación de Pontevedra e impartirase luns e mércores de 17.00 a 18.30 horas dende o 4 de outubro ata o 12 de decembro deste ano. As clases serán no centro polivalente do Rosal e terán un prezo único de 7 euros por persoa os tres meses.

Todos aqueles rosaleiros e rosaleiras interesadas poderán inscribirse para participar a través do teléfono 646 633 958.